(месяца июня 18 / июля 1)

На велицей вечерни

На Господи воззвах: стихиры на 8, гл. 1.

Радуйся, горо Пюхтицкая, / слава бо Господня на тебе возсия, / се бо Пречистая Богородица / восхоте устроити зде обитель Свою честную, / инокиням тихое пристанище, / православным людем священное прибежище // и миру утешение велие.

Якоже купина, огнем опаляема и невредима пребывши, / явися Моисею в Синаи иногда, / тако и обитель Пречистыя Приснодевы на горе Пюхтицкой, / благодатию сияющи, непоколебима пребывает, // освящающи всех, с верою в ней водворяющихся.

Радуйтеся, инокинь лицы и вси людие, / яко открыся источник благодати неистощаемый / на святей горе Пюхтицкой, / от него же изобильно почерпаем воды благодатныя, / очищающия и освящающия души наша,// и в живот вечный вводящия.

Инокини честнии иногда / лик Приснодевы, гору Пюхтицкую освятившия, на иконе изобразиша, / и в дар отцу своему, Кронштадтскому пастырю, принесоша, / ныне же имуще сию, / яко солнце пресветлое сияющее и источник благодати, / умильно к Пречистей глаголем: / радуйся, Благодатная, с Тобою Господь, // подаяй Тобою нам велию милость.

Ангел земный и человек небесный, / святый праведный Иоанн Кронштадтский, / взирая на образ явления Пречистыя на горе Пюхтицкой, / пред ним умиленно выну моляшеся / и повеле вдати икону по кончине своей в руце благочестивии, / идеже и пребысть неврежденна в годину лютых испытаний, / и паки во обители Пюхтицкой водворяется // во утешение душ наших.

Радуется днесь обитель Успенская, / имущи в себе всечестную икону Пюхтицкую, / яко залог спасения, / и с верою и любовию взывает Богородице: / сохрани, о Всемилостивая, обитель нашу от всякаго обстояния, / соблюди нас в мире, любви, единомыслии // и спаси души наша, яко Всеблагая.

Инокинь соберитесь всечестных множество, / верно празднующе, днесь радующеся / и светло восклицающе вси в веселии: / образ бо чудный Божия Матере / преславно днесь во обитель возвращается, / на ограждение обители Пюхтицкия // и всем верным во утешение.

Возвысилася еси паче Херувим, Всенепорочная Богородительнице, / и Ангельския силы чистотою превзошла еси, / глубина Твоя неизреченная недоступна есть и небожителем, / просияла еси паче солнца / во славе Сына Твоего, Христа Бога нашего, / обаче и род наш грешный не оставляеши, / посещающи нас чудотворными иконами Твоими // и избавляющи от бед и скорбей рабы Твоя.

Слава и ныне, глас 8-й:

Преукрашенная Приснодево, / во вся веки благословенная, / не презри молитвы призывающих Тя, / но услыши сердечное воздыхание взирающих к Тебе / и якоже праведному Иоанну скоро притекала еси в помощь, / притецы с кротостию к душам нашим. / Буди нам Путеводительница к Небесному Отечеству / и сопричти нас к блаженному собору избранных Божиих.

Вход. Прокимен дне. Чтения 3:
Бытия чтение (глава 28):

Изыде Иаков от студенца клятвеннаго и иде в Харрань. И обрете место, и спа тамо. Зайде бо солнце, и взят от камения места того, и положи возглавие себе, и спа на месте оном. И сон виде, и се лествица утверждена на земли, еяже глава досязаше до Небес, и Ангели Божии восхождаху и низхождаху по ней. Господь же утверждашеся на ней и рече: Аз Бог Авраамов, отца твоего, и Бог Исааков, не бойся: земля, идеже ты спиши на ней, тебе дам ю и семени твоему. И будет семя твоё, яко песок земный, и распространится на море, и ливу, и север, и на востоки, и возблагословятся о тебе вся колена земная и о семени твоем. И се Аз с тобою, сохраняяй тя на всяком пути, аможе аще пойдеши, и возвращу тя в землю сию, яко не имам тебе оставити, дондеже сотворити ми вся, елика глаголах тебе. И воста Иаков от сна своего, и рече: яко есть Господь на месте сем, аз же не ведех. И убояся, и рече: яко страшно место сие, несть сие, но дом Божий, и сия врата Небесная.

Пророчества Иезекиилева чтение (главы 43 и 44):

Тако глаголет Господь: будет от дне осмаго, и прочее, сотворят иереи на олтари всесожжения вашего и яже спасения вашего, и прииму вы, глаголет Адонаи Господь. И обрати мя на путь врат святых внешних, зрящих на востоки, и сия бяху затворена. И рече Господь ко мне: врата сия затворена будут и не отверзутся, и никтоже пройдет сквозе их, яко Господь Бог Израилев пройдет ими, и будут затворена. Яко игумен сядет в них снести хлеб, по пути еламских врат внйдет и по пути его изыдет. И введе мя по пути врат святых, сущих к северу, прямо храму, и видех: и се исполнь славы храм Господень.

Притчей чтение (глава 9):

Премудрость созда Себе дом и утверди столпов седмь. Закла Своя жертвенная, и раствори в чаши Своей вино, и уготова Свою трапезу. Посла Своя рабы, созывающи с высоким проповеданием на чашу, глаголющи: иже есть безумен, да уклонится ко Мне. И требующим ума рече: приидите, ядите Мой хлеб и пийте вино, еже растворих вам. Оставите безумие, и живи будете, и взыщите разума, да поживете, и исправите разум в ведении. Наказуяй злыя, приимет себе безчестие, обличаяй же нечестиваго, опорочит себе, обличение бо нечестивому, раны ему. Не обличай злых, да не возненавидят тебе; обличай премудра, и возлюбит тя. Даждь премудрому вину, и премудрший будет; сказуй праведному, и приложит приимати. Начало премудрости страх Господень, и совет святых разум. Разумети бо закон помысла есть благаго, сим бо образо многое поживеши время, и приложатся тебе лета живота.

На литии стихиры, глас 1-й:

Грядите радостно, инокинь лицы, / почерпите благодать неоскудную / от пречудныя иконы Богоматере, светом сияющия, / и приимите ю с верою и любовию, / яко в стену и ограждение обители вашей преславно даруется, / да покрыет вас от всех враг видимых и невидимых / и озарит обитель Свою // иконы святыя пришествием.

Слава, глас тойже:

Имея любовь велию к Пречистей Владычице нашей, / святый праведный Иоанн Кронштадтский, / ревнитель усердный иноческаго жития показася, / многия обители на Святей Руси основа, / тако и чад своих духовных во обитель новоустроенную Пюхтицкую посылая, / глаголаше к ним: «идите в Пюхтицу»: // тамо бо три ступени до Царства Небеснаго.

И ныне, глас 5-й:

Приидите людие, / чудотворному и всечестному поклонимся Божия Матере образу, / егоже дарова обители Пюхтицкой, / стража неусыпна и необорима, / ограждает бо святую обитель / и всех притекающих с верою Своим Покровом / и дарует обильныя верным Своим милости / от неистощимаго источника святыя иконы, / темже воспевающе, Богородице воззовем: / радуйся, образом Своим святым нас просвещающая, // радуйся, миру помоще и спасение душ наших.

На стиховне стихиры, глас 2-й:

Слава Тебе, Христе Царю, слава многому о нас милосердию, яко даровал еси икону Твоея Пречистыя Матере, благодати токи нам неоскудно изливающую.

Стих: Помяну имя Твое во всяком роде и роде.

Иконы Твоея чудесным пришествием явила еси Твое к нам благоволение, темже обитель Пюхтицкая радуется, инокинь честных собрание ликовствует, с нимиже воспевают Богородице и вси вернии.

Стих: Слыши, Дщи и виждь, и приклони ухо Твое.

Ангельстии чинове Тебе, всех Царице, раболепно служат и благоговейне почитают святую икону Твою, како же Тя возможем достойно пети мы, смиреннии и недостойнии?

Слава и ныне, глас 2-й:

Иконы Твоея явление, / Богородице Пренепорочная,/ славословим днесь и Твое заступление празднуем: / яко бо Мати сущи живота, / молиши о нас Сына Твоего и Бога нашего, // на Тя упование и надежду возложивших.

Тропарь, глас 4-й:

Днесь светло красуется земля Эстонская, / прославляющи Заступницу Усердную рода христианскаго, / освятившую явлением Своим гору Пюхтицкую / и обители икону чудотворную даровавшую. / Приидите, вернии, поклонимся чудному Ея образу, / дарует бо обильный дары целебныя, / избавляющи искушений, бед и всякаго греха. / Сего ради, воспевающе, воспоим Пречистей: / радуйся, Любезная миру Помощнице и Пречистая наша Мати.

На утрени

На Бог Господь: тропарь М. Б. – дважды.
Слава, и ныне: тот же.
Акафист.

По 1-й кафизме седален:

Пречистая Богородице Дево, помилуй нас, прибегающих с верою к Тебе и просящих теплаго Твоего заступления: можеши бо, яко Благая, всех спасти Матерними Твоими молитвами.

По 2-й кафизме:

Правоверно чтущия Тя и к Тебе прибегающия и иконе Твоей святей любезно покланяющияся, О, Божия Мати, спаси и не даждь в расхищение супостатом, ниже да найдут на ны вся злая, яже грехи наша уготоваша нам, ниже беззакония наша да превзыдут на главы наша, но да Твоя Матерняя к Богу преодолеет за ны благоприятная молитва.

По полиелее седален:

Пречистая Твоя икона, Богородице Дево, врачество всего мира духовное: к ней же прибегаем, Тебе покланяющеся, почитаем и лобызаем ю, исцелений благодать почерпающе от нея и недугов телесных и душевных страстей Твоими молитвами свобождаемся.

Величание:

Величаем Тя, / Пресвятая Дево, / Богоизбранная Отроковице, / и чтим образ Твой святый, / имже точиши исцеления, / всем с верою притекающим.

Степенна, 1-й антифон 4-го гласа.

Прокимен, глас 4-й: Помяну Имя Твое во всяком роде и роде.

По 50-м псалме стихира, глас 6-й:

Святый Пророк Божий Иезекииль / видения Господа Славы бысть удостоен / во времена плена Вавилонскаго, / такожде и чудная икона Владычицы нашея / во дни власти безбожныя во обители водворяется, / да познают вси вернии покровительство Пречистыя, / никогдаже обитель Свою оставляющую.

Канон Пресвятей Богородице, глас 8-й.
Песнь 1

Ирмос: Воду прошед, яко сушу, / и египетскаго зла избежав, / израильтянин вопияше: / Избавителю и Богу нашему поим.

О, Троице Вседержительная и Единице Триипостасная, душу мою, и сердце, и ум, молю, просвети и благодатию освяти, к Божественней Твоей любви возведи и настави благочестно пети благосердие Приснодевы Благословенныя.

Благаго Царя Благая Мати, Яже всем благопослушная в прошениях и всесильная в благодеяниих! Благодать света Твоего и нам низпосли, Богоблагодатная, песнь Тебе возсылающим.

Слава: Лик Ангельский радостно славословит Тя, Владычице. Мы же, бреннии, что Ти принесем? Точию усердная благодарения.

И ныне: Архангельский глас вопием Ти, Чистая: радуйся, Благодатная. Аще и недостойни есмы, благости ради приими сей, Владычице, светом милости Твоея нас просвещающи и благодать всем подающи.

Песнь 3

Ирмос: Утверждей в начале Небеса разумом / и землю на водах основавый, / на камени мя, Христе, заповедей Твоих утверди, / яко несть свят, паче Тебе, Едине Человеколюбче.

Грядите, вернии, почтим Пречистую Богоматерь, явлением святаго образа Своего гору Пюхтицкую освятившую и мир и благословение людем православным дарующую.

Освящается, Богородице, Твоею благодатию всяк ум верных и возвышается к Горнему чудным пришествием иконы Твоея, юже благочестно почитаем и Тебе верно славим.

Слава: Даждь нам, Богоневестная, ненаветно шествовати стезею богоугодных деяний, яко да Твоим, Дево, заступлением, злокозненнаго пути уклоньшеся, присносущныя славы будем общницы.

И ныне: Ангельскаго мира вышшая, Пресвятая Дево, Владычице, омраченная грехми сердца наша просвети и от земных попечений к Небесному покою настави.

Седален:

Светлое днесь Заступницы нашея наста торжество, да ликовствуют инокинь лицы и человечестии собори, созывает бо нас Богородица видети икону Свою, лучами милости верныя просвещающую. Темже радующеся вопием: спаси, Госпоже, от глада, огня, меча и бед нас, почитающих явление иконы Твоея.

Песнь 4

Ирмос: Ты моя крепость, Господи, / Ты моя и сила, / Ты мой Бог, Ты мое радование,/ не оставль недра Отча/ и нашу нищету посетив. / Тем с пророком Аввакумом зову Ти: / силе Твоей слава, Человеколюбче.

Образ честный Твой, Дево, Творец всех и Создатель вседержительною силою днесь преславно на гору святую возврати, на спасение человеком и исцеление.

Неизреченному Божию дарованию, иконе Пречистыя Девы, приидите, вернии, поклонимся и с любовию умильно возопиим: низпосли, о Благодатная, милость рабом Твоим.

Слава: Пречистый Твой образ, Всепетая, неизреченными чудесы и благодатьми украсивши, в земли Эстонской прославила еси. Сего ради мы, покланяющеся тому, песнь благодарения Тебе приносим.

И ныне: Помощнице всем христианом, от Бога нам дарованная, Того моли, Всеблагая, да презрит наша безчисленная согрешения и избавит тьмы кромешныя и муки вечныя.

Песнь 5

Ирмос: Утренюет дух мой к Тебе, Боже, / от Отца рожденному неизреченно / и воздвигнувшему рог спасения нам.

Ты, о Благодатная, милостивным днесь явлением иконы Твоея Пюхтицкия обитель благословила еси и гору святую Твою просветила еси, к свету Вышния славы верныя возводящи.

Омрачихомся помыслы, отягчихомся грехи, но Ты, Милосердная Мати, просвети ны и на правый путь настави.

Слава: К пречестней Твоей иконе благочестно при- текающия, о Богомати, и усердно покланяющияся, и верно повсюду Тя призывающия предвари, от бед всяких спасающи, и лютых недуг избавляющи, и духи лукавыя прогоняющи, тишину и здравие подающи всем, Владычице.

И ныне: Не остави нас, Богородительнице, лютыми помышлении и воспоминании от лукавых врагов стужаемых зельне, но осени Твоею благодатию, покрывающи и спасающи от всех их навет, Богоблаженная.

Песнь 6

Ирмос: Молитву пролию ко Господу / и Тому возвещу печали моя, / яко зол душа моя исполнися / и живот мой аду приближися, / и молюся, яко Иона: / от тли, Боже, возведи мя.

Обитель Пюхтицкая в преславнем пришествии Твоея иконы, Царице, чудес и Божественных даров благодатию Твоею исполнися во утверждение благочестия всех верных, еюже днесь супостаты низлагаются и славящия Тя крепце утверждаются.

Сохрани от сопротивных нахождения и от всех навет вражиих, Дево Богоневесто, святый дом Твой, селение святое сие, и вся грады и страны христианския, любовию поющия Тя и верно почитающия пречистый образ Твой.

Слава: Освящение, здравие и спасение подавай душам и телесем нашим, Мати Божия, благочестно покланяющимся иконе Твоей и усты и сердцем благоговейне со страхом целующим и верою Тя присно славящим.

И ныне: Державный покров и стену необориму стяжавше Тя, Приснодево Богородице, упование на Тя с Богом возлагаем и прилежно молим: силою Твоею стрелы вражия и козни вся бесовския немощны покажи и крепкая Помощница нам буди.

Кондак, глас 5-й:

Притецем, вси вернии, / к Источнику Неистощимому, Пречистей Богородице, / почерпем воду спасения, глаголюще: / радуйся, Владычице, / жажду спасения утоляющая, / язвы греховныя омывающая, / исцеление душ и телес дарующая. / Призри на любящия и славящия Тя / и покрый нас покровом Твоим.

Икос

Радуется и ликовствует обитель Пюхтицкая, торжествует и вся земля Эстонская, се бо грядет чудная икона, еюже Божия Матерь дарует в бедах избавление и в скорбех утешение. Темже Богородице с любовию возопиим: радуйся, явлением Своим гору Пюхтицкую освятившая, радуйся, обитель славную зде устроившая, радуйся, источник воды живыя в той открывшая, радуйся, непрестанно на земли и на небеси восхваляемая и славимая, радуйся, Всемилостивая Мати, во обители Твоей незримо с нами пребывающая.

Песнь 7

Ирмос: Божия снисхождения / огнь устыдеся в Вавилоне иногда, / сего ради отроцы в пещи радованною ногою, / яко во цветнице, ликующе, пояху: / благословен еси, Боже отец наших.

Честный образ Твой, Владычице, неизреченною благодатию присно сияет и даровании духовными земныя просвещает, к Небесному наставляет и к вечному животу устрояет за неизглаголанную Твою благость.

Твоего боголепнаго явления, Чистая, и преславнаго иконы пришествия и чудес пучины, витийствующих уста никакоже возмогают исповедати. Мы же, немощнии, что возглаголем? Точию: помилуй и спаси нас, Всемилостивая Владычице.

Слава: Известная верных Помощнице и всех благих Подательнице, приими нас, с любовию к Тебе припадающих и вопиющих: помилуй нас, Госпоже, помилуй нас, якоже ныне, тако и во оный день буди нам Помощница и Заступница.

И ныне: Мати Божия Милосердая, двери милости Твоея отверзи нам и от уст мысленных волков исхити, хотящих нас до конца погубити. Помилуй, молим Тя, Владычице, помилуй, не отврати рабы Твоя.

Песнь 8

Ирмос: Покрываяй водами превыспренняя Своя, / полагаяй морю предел песок и содержай вся, / Тя поет солнце, Тя славит луна, / Тебе приносит песнь вся тварь, / яко Содетелю всех во веки.

Преславная днесь поюще, святей иконе Твоей благоговейне покланяемся, Госпоже Царице. Славящия Тя благодатию божественною осени, на враги укрепи и отечество наше в мире соблюди.

Инокини Пюхтицкия и вкупе с ними вси человецы и ангельския силы воспевают Всеблагой Владычице, токи благодати источающей от Своея чудотворныя иконы: хвалим, благословим, покланяемся Ти, Богородительнице, поюще и превозносяще Твоя чудеса во вся веки.

Слава: Радости вина, Всеблагословенная, радуйся, Всенепорочная, радуйся, Благодатная, держава наша и ограждение и спасительное прибежище. Спаси ны, рабы Твоя, на Тя бо надеемся и Тебе поем во веки.

И ныне: Тя жизни нашея Хранительницу крепку стяжахом и Надежду спасения. Молим Тя, Благосердая: по кончине нашей ходатайствовати не престай о нас, яко да будущих стязаний избавимся и милостива обрящем Сына Твоего и Бога нашего в день Судный.

Песнь 9

Ирмос: Ужасеся о сем Небо, / и земли удивишася концы, / яко Бог явися человеком плотски / и чрево Твое бысть пространнейшее небес. / Тем Тя, Богородице, / Ангелов и человек чиноначалия величают.

Икона Твоя, Владычице, святолепно явися в Пюхтицкой обители, верныя благодатию озаряющи, вопиющия: истинно честнейши всех еси, Дево Чистая.

Благодарственное пение за неизреченное Твое милосердие, Богоблагодатная, от нас приими, прошения наша на пользу исполняющи, и к высоте Горней всех возведи, верно зовущих: истинно вышши всех еси, Дево Всенепорочная.

Слава: Чудес и милостей Твоих, Владычице, к земли Эстонской никакоже достойно украсити можем витийством словес, точию усердно молим Тя, Царице: спасай нас всегда, на Тя бо упование возложихом.

И ныне: Роди вси, блажим Тя, Богородице, яко радости вся ны исполнила еси преславным явлением иконы Твоея, Пречистая. Ей же днесь покланяющеся, умильно молим Тя: не лиши, Владычице, Твоих рабов и в будущем веце неизреченный радости.

Светилен:

Икону Твою всечестную приимше инокинь собрание, вопияху Тебе, Владычице: о сладкая Мати Царя Христа, буди покров Твоей обители и радость всем верным.

На хвалитех стихиры, глас 1-й:

Изыде Иаков от студенца клятвеннаго и иде в Харрань и лествицу виде во сне и глагол Божий слыша и рече: яко есть Господь на месте сем. Такожде и пастырие стад овчих Жену видевше светом облеченну стоящу на горе, ужасом и трепетом исполнишася. Ныне же дев собрание хвалу воздает Деве Чистей и со Иаковом радостно взывает: место сие есть дом Божий и сия врата Небесная.

Наследова Иаков землю обетованную, о нейже рече Бог: тебе дам ю и семени твоему. Такожде и души боголюбивыя и сердца Христу верная ныне улучиша землю желанную, гору Пюхтицкую Богородицкую, в нейже спасение свое содевают, под светлым покровом Пречистыя пребывающе и славяще явление Ея словесы и песньми достодолжными.

Днесь сияет благодатию Божиею гора Пюхтицкая, идеже явися Жена Благолепная, светом дивным облеченная, Избранница из всего рода человеча, изволившая сотворити гору сию местом селения славы Своея, местом чистаго и непорочнаго Христу Богу служения, местом Святыни Господней в долготу дний.

Инокини честнии иногда, память творяща чудеснаго посещения Твоего, Владычице, на иконе Тя изобразиша руце долу простирающую и николиже милостию Своею землю сию оставляющую, от бед и скорбей избавляющую, Покровом Своим всеблагим ограждающую, яко да выну славословят явление Твое на горе сей.

Слава и ныне, глас 2-й:

О, Мати Благая, Госпоже Богородице, / не отрини нас, смиренных рабов Твоих, / приносящих недостойныя наша молитвы / пред пречистою Твоею иконою. / Буди теплая Ходатаица о нас грешных к Сыну Твоему,/ избави нас от всех бед и искушений, / да спасаеми Тобою, выну вопием Ти: / радуйся, Дево Чистая, / руце Свои милостивно к нам простирающая.